Helpu eich plentyn i symud i ysgol newydd

Gall newid ysgol fod yn gyfnod cyffrous ond heriol i bob person ifanc. Mae pob plentyn yn wahanol, felly dewiswch syniadau sy'n gweithio orau i'ch teulu. Mae'r sgiliau hyn yn cymryd amser i'w dysgu, felly mae ymarfer ac amynedd wir yn bwysig. 

Beth all fod yn anodd? 

Mae llawer o blant a phobl ifanc yn cael trafferth gyda newid, yn enwedig pan nad ydyn nhw'n gwybod beth i'w ddisgwyl. Gallai plentyn gael trafferth oherwydd:  

• Mae’n ei chael hi'n anodd rheoli teimladau mawr fel straen a phryder 

• Mae'r amgylchedd newydd yn llethol - goleuadau llachar, sŵn uchel, gwres, torfeydd neu lawer o weithgarwch 

• Dydy’r plentyn ddim eto'n deall rheolau na threfn yr ysgol newydd 

• Mae’n ei chael hi'n anodd cyfathrebu neu'n cael trafferth mynegi ei hun 

Awgrymiadau gorau ar gyfer y newid 

• Defnyddiwch galendr cyfrif i lawr. Marciwch bob diwrnod gyda'i gilydd fel y gall weld pryd mae'r newid yn dod.  

• Chwiliwch am yr ysgol newydd ar-lein. Archwiliwch luniau, fideos a gwybodaeth fel bod yr amgylchedd yn teimlo'n fwy cyfarwydd. Gall diwrnodau pontio sy’n cael eu cynnig gan yr ysgol helpu hefyd.  

• Ceisiwch gael yr amserlen yn gynnar os yn bosibl. Helpwch eich plentyn i ddysgu sut i'w ddarllen. Gall codio lliw ar bynciau ei gwneud hi'n haws i'w ddeall.  

• Gwnewch amserlen weledol ar gyfer arferion dyddiol. Mae hyn yn helpu eich plentyn i wybod beth i'w ddisgwyl. Gadewch iddo helpu i'w greu fel ei fod yn teimlo mwy mewn rheolaeth.   

• Meddyliwch am beth sy'n helpu'ch plentyn i dawelu yn ystod cyfnodau o newid, fel dal hoff eitem neu degan ‘fidget’.  

Syniadau ar gyfer gweithgareddau i helpu eich plentyn i baratoi 

• Gwnewch ardal/cornel ysgol gartref. Cadwch eitemau ysgol mewn un lle fel eu bod yn hawdd dod o hyd iddyn nhw. Cadwch gopi o'r amserlen yno hefyd. 

• Defnyddiwch ffolderi neu waledi â chod lliw. Er enghraifft, coch ar gyfer mathemateg, glas ar gyfer gwyddoniaeth. Mae hyn yn helpu gyda threfnu a phacio ei fag.   

• Rhowch gynnig ar wisg newydd yn gynnar. Mae hyn yn ei helpu i ddod i arfer â sut mae'n teimlo. 

• Ymarferwch newid ar gyfer Ymarfer Corff gartref. Gall hyn ei gwneud hi'n haws pan fydd yn rhaid iddo ei wneud yn gyflym mewn amgylchedd ysgol prysur.  

• Ymarferwch y daith i'r ysgol. Mae cerdded neu yrru'r llwybr yn ei helpu i wybod beth i'w ddisgwyl.  

• Cynlluniwch drefn ar ôl ysgol. Gall taith gerdded adref, rhywfaint o awyr iach neu weithgaredd ymlaciol ei helpu i ymlacio ar ôl diwrnod prysur.  

Os ydych chi'n poeni am eich plentyn yn symud i ysgol newydd, siaradwch â'i athro/athrawes dosbarth neu'r Cydlynydd Anghenion Dysgu Ychwanegol (CADY). Gallan nhw helpu i drefnu ymweliadau pontio ychwanegol a phenderfynu a oes angen mwy o gefnogaeth.