Er mwyn cefnogi’r uchelgais o wella canlyniadau iechyd sy’n canolbwyntio ar yr unigolyn a defnyddio ein hadnoddau’n fwy effeithiol, mae angen inni ofyn i bobl am eu profiadau iechyd a’u canlyniadau o’r ymyriadau a’r gofal a ddarparwn. Rydym yn gwneud hyn drwy greu a defnyddio system a yrrir gan ddata sy’n ceisio casglu a darparu gwybodaeth amserol i ddinasyddion, timau clinigol a’n sefydliad er mwyn llywio’r broses o wneud penderfyniadau ar y cyd sy’n arwain at y canlyniadau hynny. Sicrhau’r canlyniadau sydd bwysicaf i gleifion yw’r gwerth mewn iechyd a gofal cymdeithasol.
Mae ymagwedd VBHC yn golygu y gofynnir i gleifion sut maent yn teimlo a sut mae eu cyflyrau'n effeithio ar eu bywydau cyn iddynt ddod i'r ysbyty am apwyntiad neu driniaeth ac wedi hynny. Mae hyn yn ein helpu i fesur a monitro'r newidiadau sy'n digwydd, ac a yw eu hiechyd a'u heffaith ar eu bywydau wedi gwella oherwydd y gofal a dderbyniwyd. Mae hyn yn helpu i nodi'r gofal a'r driniaeth sy'n cael effaith gadarnhaol ar y claf a'i gyflwr iechyd. Gall hefyd nodi lle mae gofal gwerth isel, nad yw'n cael effaith gadarnhaol ar y claf neu'r cyflwr, yn cael ei brofi.
PROM (Mesur Canlyniad a Adroddir gan Gleifion) . Diben PROM yw casglu gwybodaeth o safbwyntiau'r claf ei hun drwy holiadur. Trwy hyn, bydd cleifion yn cael y cyfle i asesu sut maent yn teimlo cyn ac ar ôl triniaeth. Mae hyn wedyn yn rhoi statws iechyd i'r staff clinigol yn uniongyrchol oddi wrth y cleifion eu hunain ar adeg benodol. Gall y broses hon helpu cleifion a staff clinigol i fesur effaith ymyriad tra byddant yn cael eu trin am gyflwr iechyd. Mae'n caniatáu i'r claf a chlinigwyr wneud penderfyniadau gwell gyda'i gilydd ac mae'n galluogi pwynt cyffwrdd mwy personol.
PREM (Mesur Profiad a Adroddir gan Gleifion) . Mae'n debyg iawn i PROM gan mai ei ddiben yw casglu gwybodaeth gan gleifion trwy holiadur. Fodd bynnag, yn lle asesu sut mae claf yn teimlo ar adeg benodol o fewn ei daith gofal iechyd, mae PREM yn mesur profiad claf wrth dderbyn ei ofal. Bydd y PREM yn helpu i ganfod rhyngweithiadau cleifion o fewn y system gofal iechyd ac a yw anghenion y cleifion yn cael eu diwallu. Mae hefyd yn dangos meysydd o ragoriaeth a meysydd o bryder i'n galluogi i ymchwilio ymhellach. Mae'n rhoi cyfle i feincnodi a chymharu profiad cleifion ar draws Bwrdd Iechyd Prifysgol Cwm Taf.
WREM (Mesur Profiad a Adroddir am y Gweithlu). Holiadur yw hwn a luniwyd yn benodol ar gyfer staff. Ei nod yw casglu profiadau staff Bwrdd Iechyd Prifysgol Cwm Taf wrth ymgymryd â thasg/proses benodol. Bydd yn helpu i lywio gwelliannau lleol tra hefyd yn mesur ac yn gweithredu ar brofiadau staff. Mae’n rhoi cipolwg mewn amser ar sut mae mesurau profiad ein staff yn ein helpu i gyflwyno PROMS a PREMS o fewn Bwrdd Iechyd Prifysgol Hywel Dda tra hefyd yn nodi meysydd i’w datblygu. Mae ein holiaduron WREM wedi’u cysylltu’n uniongyrchol â’n gwerthoedd craidd fel bwrdd iechyd, lle rydym yn gwrando, yn dysgu ac yn gwella.