Brechlyn Ffliw

Ymgyrch Ffliw Gaeaf 2025

Mae’r wybodaeth ganlynol yn ymwneud â thymor COVID-19 2025-26.    

Gweithwyr BIPCTM: ewch i'n tudalen brechu pwrpasol ar gyfer staff. 

Diweddarwyd: 17 Hydref 2025 

Bob blwyddyn yng Nghymru, mae tua miliwn o bobl yn cael eu brechlyn ffliw. Mae hynny'n fwy nag un o bob pedwar person.    

Mae'r ffliw yn fwy tebygol o fod yn ddifrifol os oes cyflwr iechyd hirdymor gyda chi, neu os ydych chi’n feichiog neu'n hŷn.    

Gall ffliw fod yn ddifrifol i blant ifanc hefyd.   

Am y Brechlyn Ffliw

Gall y ffliw fod yn ddifrifol iawn. Mae'n cael ei achosi gan feirws, sy'n cael ei ledaenu gan beswch a thisian. Gall symptomau ffliw fod yn ysgafn ond gall hefyd arwain at afiechydon mwy difrifol fel broncitis a niwmonia (heintiau ar yr ysgyfaint), a all fod angen triniaeth yn yr ysbyty. 

Mae ffliw yn heintus iawn, a gall symptomau ymddangos yn gyflym iawn. Mae symptomau ffliw yn cynnwys tymheredd uchel, blinder a gwendid, cur pen, poenau a pheswch. Mae rhagor o wybodaeth am y ffliw ar gael ar wefan GIG 111 Cymru.  

Mae achosion o ffliw y rhan fwyaf o aeafau, yn enwedig mewn ysbytai a chartrefi gofal. 

Mewn gaeaf arferol, bydd miloedd o bobl yn marw o salwch sy'n gysylltiedig â ffliw yn y DU. Cael brechlyn ffliw bob blwyddyn yw un o’r ffyrdd gorau o amddiffyn rhag y ffliw. Mae’n bwysig iawn cael eich brechlyn ffliw bob blwyddyn os ydych chi’n gymwys. 

Mae brechlynnau ffliw yn gyflym ac yn ddiogel iawn a gallent atal wythnosau o salwch difrifol. 

Gwrandewch ar Rhianydd Davey, Cydlynydd Imiwneiddio, ar radio GTFM yn rhannu mewnwelediadau arbenigol ar bwysigrwydd y brechlyn ffliw a sut mae'n helpu i amddiffyn ein cymunedau y gaeaf hwn. (25:15 ymlaen). Hefyd, gallwch glywed gwybodaeth am y brechiadau COVID-19 ac RSV a phwy ddylai gael y brechiadau hyn.

Pwy ddylai gael y brechlyn ffliw?   

Dylech chi gael y brechlyn ffliw os ydych chi:   

• yn feichiog   

• yn 65 oed neu hŷn (neu'n troi'n 65 cyn diwedd y rhaglen brechu ffliw – fel arfer ym mis Mawrth bob blwyddyn), neu    

• rhwng chwe mis a 64 oed gyda chyflwr iechyd hirdymor, gan gynnwys:   

  • problemau gyda'ch brest neu'ch anadlu, fel clefyd rhwystrol cronig yr ysgyfaint (COPD) neu asthma, sydd angen anadlyddion neu dabledi steroid rheolaidd   

  • problem gyda'r galon   

  • clefyd yr arennau (o gam 3)   

  • clefyd yr afu    

  • cyflyrau nerfau, fel clefyd Parkinson neu glefyd niwronau echddygol   

  • anabledd dysgu    

  • salwch meddwl difrifol   

  • diabetes   

  • epilepsi   

  • system imiwnedd wan oherwydd salwch neu driniaeth    

  • diffyg dueg neu broblem gyda'ch dueg, neu   

  • bod dros bwysau yn ddifrifol (mynegai màs y corff (BMI) o 40 neu fwy ac yn 16 oed neu'n hŷn).   

Hyd yn oed os ydych chi'n teimlo'n dda, rydych chi mewn mwy o berygl o fynd yn sâl iawn o'r ffliw os yw unrhyw un o'r uchod yn berthnasol i chi.   

Dylai'r bobl ganlynol hefyd gael y brechlyn ffliw i helpu i amddiffyn eu hunain a'r rhai o'u cwmpas.   

• Pobl sy'n byw mewn cartref gofal   

• Pobl sy'n gweithio'n uniongyrchol gyda chleifion neu gleientiaid ym maes iechyd neu ofal cymdeithasol   

• Pobl ddigartref   

• Gweithwyr dofednod sydd mewn perygl uchel    

• Plant dwy a thair oed (oedran ar 31 Awst)    

• Plant oedran ysgol a phobl ifanc o'r dosbarth derbyn i flwyddyn 11   

• Gofalwyr   

• Ymatebwyr cyntaf ac aelodau o sefydliadau gwirfoddol sy'n darparu cymorth cyntaf brys wedi'i gynllunio   

• Unigolion sy'n byw gyda rhywun sydd â system imiwnedd wan  

Bydd y rhan fwyaf o blant a phobl ifanc yn cael eu brechlyn yn gyflym a di-boen drwy chwistrell trwyn. Bydd anwedd ysgafn yn cael ei chwistrellu i fyny’r trwyn, trwy’r ddwy ffroen. Y brechlyn chwistrell trwyn yw'r brechlyn ffliw a argymhellir ar gyfer y rhan fwyaf o blant a phobl ifanc o ddwy oed ymlaen.   

Os yw eich plentyn yn gymwys i gael brechlyn ffliw, dylai’r practis meddyg teulu neu’r nyrs ysgol gysylltu â chi. Os ydych chi'n meddwl y gallai eich plentyn fod wedi methu ei frechlyn, cysylltwch â’r nyrs ysgol os yw o oedran ysgol neu’r â’r practis meddyg teulu os nad yw yn yr ysgol.  

Os ydych chi'n meddwl y gallech fod wedi methu eich gwahoddiad i gael brechlyn ffliw, cysylltwch â'ch meddyg teulu neu eich fferyllfa leol.  

Sut i gael brechiad y ffliw 

Mae'r tabl isod yn dangos pwy all gael y brechlyn ffliw a ble y gallwch ei gael.  

Bydd y brechlyn ffliw yn cael ei gyflwyno ar draws CTM gan nyrsys ysgol a meddygon teulu fel a ganlyn: 

Yn ddelfrydol, dylid rhoi'r brechlyn ffliw cyn i'r ffliw ddechrau lledaenu. Fodd bynnag, gellir ei roi ar ddyddiad yn ddiweddarach hefyd.