Symptomau Llawr y Pelfis

Beth rydyn ni’n ei wneud

Rydyn ni’n ffisiotherapyddion arbenigol, sydd wedi cael ein hyfforddi ym maes iechyd y pelfis. Yn rhan o hyn, gallwn ni helpu os ydych chi’n cael problemau gyda llawr eich pelfis.

Mae llawr y pelfis yn bwysig i lawer o brosesau gwahanol. Mae'r rhain yn cynnwys rheoli ymataliaeth y bledren a'r coluddyn, cefnogi ein cynnwys abdomen a'r pelfis (gan gynnwys ein babanod pan fyddwn yn feichiog), darparu sefydlogrwydd i'n asgwrn cefn a'n pelfis a helpu gyda sut mae ein organau rhywiol yn gweithio.

Os dydy cyhyrau llawr y pelfis ddim yn gweithio’n iawn (sy’n gyffredin ymhlith menywod) efallai y byddwch chi’n teimlo poen neu’n dioddef o symptomau oherwydd gwendid yng nghyhyrau llawr y pelfis. Gall hyn gynnwys anymataliaeth (gollwng wrin wrth besychu neu wrth wneud ymarfer corff), prolaps neu boen wrth gael rhyw. Gallwn ni gynnig sesiynau triniaeth ffisiotherapi ac asesu i fenywod sy’n cael problemau gyda llawr y pelfis, er mwyn ceisio gwella symptomau, ansawdd eu bywyd a chynnal neu adfer gweithrediad arferol.

I bwy mae’r gwasanaeth?

Ar hyn o bryd mae ein gwasanaeth ar gyfer unigolion dros 16 oed sy'n profi problemau gan gynnwys:

Prolaps
Anymataliaeth
Hollt yn y perinëwm neu episiotomi (toriad) ar ôl rhoi genedigaeth
Poen wrth gael rhyw
Poen yn y pelfis

All unrhyw un ddefnyddio'r gwasanaeth hwn?

Mae modd i’ch meddyg teulu, bydwraig, ymgynghorydd, nyrs ymataliaeth neu therapydd arall eich atgyfeirio.

Gallwch chi hefyd atgyfeirio eich hun drwy ffonio 01443 715012 i gael ffurflen hunan-asesu

Oriau agor
Dydd Llun i ddydd Gwener 8am – 4pm

Beth i'w ddisgwyl

Bydd ein tîm gweinyddol yn cysylltu â chi naill ai dros y ffôn neu drwy’r post. Byddwch yn cael eich gwahodd i sesiwn addysg llawr y pelfis i ddechrau. Bydd y sesiwn hwn yn rhoi llawer o wybodaeth werthfawr i chi am gyhyrau llawr y pelfis a’u rôl yn iechyd y prolaps ac anymataliaeth, ynghyd â llawer o gyngor defnyddiol am sut i ddechrau cymryd rheolaeth o’ch symptomau. Mae'n bwysig iawn eich bod chi'n dod i'r dosbarth cyn mynychu'r apwyntiad cyntaf. Ar ôl y dosbarth, gallwch wedyn drefnu asesiad unigol gyda ffisiotherapydd iechyd y pelfis arbenigol benywaidd, a fydd yn cael ei gynnal mewn ystafell driniaeth breifat. Efallai bydd angen gwneud asesiad o’r tu fewn i’ch gwain a/neu eich rectwm er mwyn asesu cyhyrau llawr y pelfis a phenderfynu ar y driniaeth sydd orau i chi.

Os ydych chi am i rywun fod yno yn ystod yr asesiad, rhowch wybod i ni ymlaen llaw fel bod modd i ni drefnu hyn.

Peidiwch ag aildrefnu apwyntiad yn ystod eich mislif, gan fod opsiynau eraill ar gael o ran triniaeth ac asesu bob tro ar yr adeg hon.

Dewch â rhestr gyda chi o’r moddion rydych chi’n eu cymryd ar hyn o bryd hefyd.

Cysylltwch â ni

Gallwch chi gysylltu â’n tîm gweinyddol trwy ffonio 01443 715012. Ar hyn o bryd rydym yn cynnig apwyntiadau yn Ysbyty Tywysoges Cymru, Ysbyty Brenhinol Morgannwg, Ysbyty Cwm Cynon, ac Ysbyty'r Tywysog Siarl. Os byddai’n well gyda chi gael eich asesu a’ch trin yn y Gymraeg, mae hyn yn bosibl ar hyn o bryd yn Ysbyty Cwm Cynon, Aberpennar. Gofynnwch am hyn wrth ffonio i drefnu eich apwyntiad. Mae’n bwysig eich bod yn rhoi gwybod i ni cyn gynted â phosibl os na allwch chi ddod i’r apwyntiad oedd wedi ei drefnu. Mae hyn yn rhoi’r cyfle i ni i gynnig yr apwyntiad i rywun arall, a thrwy wneud hynny gadw ein rhestrau aros mor fyr â phosibl. Os na fyddwch chi’n dod i’r apwyntiad heb ddweud ymlaen llaw, mae’n bosibl y byddwch chi’n cael eich rhyddhau o’r gwasanaeth.

Rydyn ni’n croesawu adborth ac awgrymiadau gan gleifion am sut y gallwn ni barhau i wella ar y gwasanaeth, felly mae croeso i chi gysylltu i roi eich sylwadau neu os ydych chi am siarad ag aelod o dîm iechyd y pelfis yr Adran Ffisiotherapi.