O McDonald's i Fydwraig - Stori Lucy

Mae Lucy, sy’n lleol i Ferthyr Tudful, wastad wedi breuddwydio am fod yn fydwraig. Ar ôl gadael yr ysgol, dechreuodd ei bywyd gwaith yn McDonald’s, ond ni adawodd ei dyhead i gefnogi menywod a theuluoedd trwy feichiogrwydd a genedigaeth. Ei phrofiad geni ei hun yn Ysbyty’r Tywysog Siarl - gyda llawer o’r cydweithwyr y mae’n gweithio ochr yn ochr â nhw heddiw - a gryfhaodd ei phenderfyniad i ddilyn ei breuddwyd.

Mae Lucy yn fam i efeilliaid wyth oed, Aurora a Theo, ac yn ystod ei chyfnod yn McDonald’s, cwblhaodd Dystysgrif Addysg Uwch mewn Astudiaethau Gofal. Gan gadarnhau ei hymrwymiad i barhau â gyrfa ym maes gofal, ac ar ôl y secondiad fel Llysgennad Cwsmeriaid a Chymuned, llwyddodd Lucy i sicrhau rôl o fewn CTM fel cynorthwyydd gofal iechyd mamolaeth. Yna gwnaeth gais i astudio bydwreigiaeth gyda Phrifysgol De Cymru a dechreuodd ei gradd ym mis Medi 2025.

Mae Lucy yn parhau i weithio ar benwythnosau yn y bwrdd iechyd fel cynorthwyydd gofal iechyd mamolaeth. Nid yw cydbwyso astudio a bywyd teuluol wrth weithio wedi bod yn hawdd, ond mae Lucy yn dweud bod y profiad ymarferol y mae'n ei gael ar y ward yn amhrisiadwy.

Mae gweithio ochr yn ochr â bydwragedd a thimau mamolaeth yn rhoi cipolwg go iawn i Lucy ar y rôl y mae'n anelu ato, gan ei helpu i feithrin hyder, sgiliau a dealltwriaeth bob cam o'r ffordd. Yn ogystal, fe gafodd ddiagnosis o ddyslecsia yn ddiweddar drwy ei chwrs prifysgol ac mae hi bellach yn derbyn cymorth i helpu gyda hyn.

Mae Lucy yn priodoli ei chynnydd i ymroddiad a phenderfyniad, y gefnogaeth gywir, a gwrthod rhoi'r gorau i nod gydol oes.

Ar Ddiwrnod Rhyngwladol y Fydwraig, gwyliwch Lucy yn siarad am ei thaith o McDonald's i fod yn fydwraig:

Mae taith Lucy yn enghraifft bwerus o sut mae newid gyrfa yn bosibl. Efallai y byddwch yn synnu at y sgiliau sydd gennych eisoes - neu y gallwch eu hennill - a sut y gallent drosglwyddo i rôl gofal iechyd.

Dywedodd Suzanne Hardacre, Cyfarwyddwr Bydwreigiaeth:

“Rwy’n falch iawn o Lucy a’i gwaith caled i gyrraedd y pwynt y mae hi ynddo heddiw. Mae hi'n gosod esiampl anhygoel o rywun sydd â breuddwyd ac yn gwneud beth bynnag sydd ei angen i gyrraedd yno, yn enwedig fel myfyrwraig aeddfed ac ar ôl cael ei phlant.

“Rydym mor hapus i allu cefnogi Lucy ar ei thaith i gymhwyso, ac nid oes gennyf unrhyw amheuaeth y bydd hi’n fydwraig ragorol.”

Trwy ei rôl cynorthwyydd gofal iechyd, mae Lucy wedi:

• Gweithio yn y theatr obstetrig
• Hwyluso ar ddyddiau hyfforddi
• Cwblhau cwrs datblygu arweinyddiaeth mamolaeth a gynhaliwyd gan Goleg Brenhinol y Bydwragedd a Llywodraeth Cymru
• Cysgodi’r Cyfarwyddwr Bydwreigiaeth
• Cysgodi yn yr Uned Mamolaeth ym Mwrdd Iechyd Prifysgol Caerdydd a’r Fro

Wrth siarad am ei chyd-gynorthwywyr gofal iechyd mamolaeth, rhannodd Lucy: “Dw i mor ddiolchgar am eu cefnogaeth. Mae’r rhan fwyaf o’n hyfforddiant yn fewnol ac mae eu gwybodaeth wedi bod yn hynod werthfawr.”

Mae stori Lucy yn tynnu sylw at yr ystod eang o gyfleoedd sydd ar gael o fewn y GIG - p'un a ydych chi newydd ddechrau neu'n ystyried newid cyfeiriad yn ddiweddarach mewn bywyd.

Os oes gennych ddiddordeb mewn gweithio gyda Bwrdd Iechyd Prifysgol Cwm Taf Morgannwg, ewch i’n gwefan swyddi i ddarganfod mwy am gyfleoedd cyfredol.

Gwirfoddoli gyda'r adran mamolaeth

Mae gwirfoddolwyr mamolaeth yn darparu cefnogaeth wrth y gwely i fenywod tra byddant yn yr ysbyty. Nod y rôl yw darparu cefnogaeth ymarferol ac emosiynol ac ategu rôl bydwragedd mewn amgylchedd prysur iawn weithiau ac yn gwella profiad y claf yn y pen draw. Dyma drosolwg o beth mae gwirfoddolwyr y dasg yn ei ddarparu:

• Sgwrsio â menywod wrth ochr y gwely
• Trosglwyddo negeseuon ffôn gan berthnasau o dan gyfarwyddyd uniongyrchol gan aelod o’r staff
• Cymorth gyda chasglu prydau bwyd / hambyrddau
• Bwydo'r babi tra bod mam yn bwyta ei phryd bwyd
• Cyfarch a chyfeirio perthnasau at y fam neu staff bydwreigiaeth
• Pasio neu gasglu eitemau personol i'r fam os nad yw hi’n gallu eu cyrraedd ei hun.
• Cyflawni negeseuon i wardiau neu adrannau eraill o dan oruchwyliaeth uniongyrchol y fydwraig sy'n gyfrifol
• Helpu'r staff i gadw ardaloedd y ward yn daclus

Ewch i’n tudalen gwirfoddoli i ddod o hyd i gyfleoedd cyfredol sydd ar gael.

05/05/2026