Cydnabod rhagoriaeth mewn diogelu ar draws GIG Cymru
Cynhaliwyd Digwyddiad Dathlu Diogelu GIG Cymru cyntaf ym mis Mawrth 2026 yng Nghastell Caerdydd. Roedd y digwyddiad yn cydnabod rhagoriaeth mewn diogelu ar draws timau ac unigolion, gan dynnu sylw at y gwaith ystyrlon ac effeithiol sy'n digwydd bob dydd ledled GIG Cymru.
Cynhaliwyd y digwyddiad gan y Gwasanaeth Diogelu Cenedlaethol, tîm o arbenigwyr sydd wedi’u lleoli yn Iechyd Cyhoeddus Cymru sy’n darparu ffocws strategol a chymorth proffesiynol er mwyn gwella diogelu ar draws y GIG yng Nghymru.
Cefndir Gwobrau
Mae diogelu yn faes gwaith hanfodol, cymhleth ac yn aml yn digwydd y tu ôl i’r llenni. Mae staff o bob proffesiwn, disgyblaeth a gwasanaeth yn gweithio i amddiffyn diogelwch, urddas a hawliau pobl, yn aml mewn amgylchiadau heriol a heb gydnabyddiaeth ffurfiol.
Roedd y digwyddiad hwn yn gyfle i oedi, myfyrio, a dathlu’r cyfraniad hwnnw, ac i gydnabod arfer diogelu sydd wedi gwneud gwahaniaeth gwirioneddol i fywydau pobl. Daeth y dathliadau i ben gyda datganiad cerddorol a the prynhawn yng Nghastell Caerdydd.
Enwebiadau
Cafodd enwebiadau eu hannog o bob grŵp proffesiynol, disgyblaeth a maes gwasanaeth. Adolygwyd y ceisiadau gan banel beirniaid diogelu uwch gan ddefnyddio meini prawf clir a chyson.
Gwobr Arweinyddiaeth Diogelu
Mae'r wobr hon yn mynd i Claire O’Keefe ac yn cydnabod arweinydd y mae ei gweledigaeth, ei dewrder a'i huniondeb wedi trawsnewid diogelu yng Nghymru.
Nododd Louise Mann, Cyfarwyddwr Diogelu yn Iechyd Cyhoeddus Cymru:
“Claire O’Keefe yw Pennaeth Diogelu yn BIP Cwm Taf Morgannwg. Mae Claire yn arwain gydag eglurder, tosturi, a dewrder proffesiynol, gan ysbrydoli cydweithwyr, partneriaid, a'r system ehangach i godi safonau, myfyrio'n onest, a chanolbwyntio'n ddi-baid ar amddiffyn y rhai sydd mewn perygl.
Mae ei dylanwad wedi llunio diwylliant diogelu sefydliadol a rhanbarthol, wedi meithrin cydweithio, ac wedi cryfhau'r ffordd rydym yn dysgu ac yn gwella. Mae arweinyddiaeth Claire, sy’n seiliedig ar werthoedd ac yn cael ei harwain gan y pen a’r galon, yn ei gwneud yn arweinydd diogelu gwirioneddol eithriadol.
07/05/2026