Camu i mewn i natur: Darganfod Llwybr Coedwig Cenedlaethol Cymru

Fel rhan o Wythnos Natur Cymru (4ydd - 12fed Gorffennaf), rydym yn annog staff ac ymwelwyr i ddarganfod cyfleoedd lleol i gysylltu â natur a chefnogi eu lles trwy gerdded a gwneud gweithgareddau awyr agored. Mae Wythnos Natur Cymru yn ddathliad blynyddol o'r natur sydd o'n cwmpas, gan annog pobl i gymryd seibiant, edrych eto a gwerthfawrogi'r bywyd gwyllt a'r mannau gwyrdd sy'n bodoli yn ein cymunedau, parciau, coetiroedd a chefn gwlad ledled Cymru.

Oeddech chi'n gwybod bod rhan o Lwybr Coedwig Cymru yn rhedeg yn agos iawn at Ysbyty Brenhinol Morgannwg? Mae'r fenter gyffrous hon yn helpu i gysylltu pobl â natur, gwella lles, a'i gwneud hi'n haws archwilio'r awyr agored - yn union ar garreg ein drws.

Ymunwch â ni yn ein sesiwn ymgysylltu galw-heibio

Er mwyn helpu staff ac ymwelwyr i ddysgu mwy, rydym yn cynnal sesiwn ymgysylltu galw heibio yn Ysbyty Brenhinol Morgannwg ar y 10fed o Orffennaf, lle gallwch ddysgu sut i wneud y gorau o'r llwybr.

Dewch draw i gyfarfod â'r tîm o Llais y Goedwig (rhwydwaith coedwigoedd cymunedol Cymru) a phartneriaid i ddysgu mwy:

Lleoliad: Prif fynedfa, Ysbyty Brenhinol Morgannwg
Dyddiad: Dydd Gwener 10fed Gorffennaf
Amser: 10:00yb - 2:00yp

Beth i'w ddisgwyl

Ar y stondin, gallwch:

Dysgu am lwybrau lleol ger Ysbyty Brenhinol Morgannwg
Gofyn cwestiynau a thrafod unrhyw bryderon
Rhannu eich adborth i helpu ffurfio gweithgareddau'r dyfodol

Mae'r tîm yn awyddus i glywed gan y staff a'r ymwelwyr am beth fyddai'n gwneud y llwybr yn fwy hygyrch ac apelgar.

Pwy ddylai ddod gyda ni?

Mae croeso i bawb - gan gynnwys:

Staff CTM, cleifion ac ymwelwyr
Unrhyw un sydd â diddordeb mewn gwella ei lles drwy gerdded
Y rhai sy'n newydd i lwybrau cerdded neu'n ansicr ble i ddechrau

Hyd yn oed os nad ydych erioed wedi defnyddio llwybr o'r blaen, mae hwn yn gyfle gwych i ddechrau.

Beth yw Llwybr Coedwig Cymru?

Mae Llwybr Coedwig Cymru yn lwybr wedi’i nodi o tua 80km, sy’n cysylltu cyfres o safleoedd Coedwig Genedlaethol ar draws De Cymru. Mae'n cynnig cymysgedd cyfoethog o dirweddau - o lwybrau arfordirol a mannau gwyrdd trefol i goetiroedd trwchus a golygfeydd panoramig o gefn gwlad - gan greu cyfleoedd i bawb fwynhau natur, p'un a ydych chi'n chwilio am daith gerdded fer neu antur hirach.

Wedi'i adeiladu'n bennaf ar hawliau tramwy cyhoeddus presennol, mae'r llwybr yn hygyrch ac yn hyblyg, gan ei wneud yn addas i deuluoedd, dechreuwyr, cerddwyr rheolaidd a'r rhai sy'n darganfod mannau awyr agored am y tro cyntaf.

Chwalu’r rhwystrau

Gall treulio amser y tu allan gael effaith bwerus ar ein lles corfforol a meddyliol. Ond rydym yn gwybod nad yw pawb yn teimlo'n hyderus wrth gyrchu llwybrau cerdded.

Mae gwaith ymgysylltu wedi dangos bod rhwystrau cyffredin yn cynnwys:

Ddim yn gwybod ble i ddechrau
Ansicrwydd ynghylch diogelwch neu hygyrchedd
Canfyddiad nad yw llwybrau “ar eu cyfer nhw”

Nod y gwaith hwn yw chwalu'r rhwystrau hynny drwy ddarparu gwybodaeth glir, anogaeth a chefnogaeth, gan helpu mwy o bobl i deimlo'n hyderus yn camu allan i natur.

Archwiliwch rannau o'r llwybr yn eich ymyl

Mae’r llwybr peilot yn cynnwys sawl adran gysylltiedig ar draws De Cymru, gan gynnwys llwybrau sy'n cysylltu:

Mae pob adran yn cynnig profiad ychydig yn wahanol - o deithiau cerdded ysgafn a thirweddol i rannau mwy anturus - felly gallwch ddewis rhywbeth sy'n addas i'ch amser, gallu a lefel hyder.

Adeiladu cymuned iachach, mwy egnïol

Mae'r gwaith ymgysylltu hwn yn rhan o uchelgais ehangach i:

Annog mwy o bobl i fwynhau'r awyr agored
Cefnogi lles corfforol a meddyliol
Creu cyfleoedd cynhwysol i staff, cleifion a chymunedau

Mae cynlluniau ar gyfer y dyfodol yn cynnwys teithiau cerdded tywysedig, adnoddau wedi'u teilwra a phartneriaethau â grwpiau cymunedol i helpu mwy o bobl i gymryd rhan a theimlo'n hyderus yn defnyddio'r llwybr.

Rhagor o wybodaeth

I ddysgu mwy am Lwybr Coedwig Genedlaethol Cymru ewch i wefan Llywodraeth Cymru - Llwybr Coedwig Cymru

08/07/2026