Bwrdd Iechyd Prifysgol Cwm Taf Morgannwg ar restr fer dwy wobr yng Ngwobrau HSJ 2026

Mae Bwrdd Iechyd Prifysgol Cwm Taf Morgannwg wedi cyrraedd y rhestr fer ar gyfer dwy Wobr HSJ genedlaethol fawreddog; un i gydnabod ei ddull arloesol dan arweiniad y gymuned o gyfathrebu ynghylch brechiadau gaeaf, a'r llall am ei wasanaeth PIPYN sy'n anelu at gefnogi plant (3-10 oed) a'u teuluoedd i wneud dewisiadau iach cynaliadwy.

Mae ymgyrch y Bwrdd Iechyd, “Mae’n Cymryd Pentref: Dull dan Arweiniad y Gymuned o Gyfathrebu Brechu’r Gaeaf,” wedi’i henwi’n un o’r rhai sydd wedi cyrraedd y rownd derfynol yng nghategori Gwobr Menter Gyfathrebu’r GIG y Flwyddyn yng Ngwobrau HSJ 2026. Mae'r wobr yn cydnabod mentrau cyfathrebu sy'n dangos creadigrwydd, arloesedd a dylanwad mesuradwy drwy ymgysylltu â chleifion, staff a chymunedau ac yn gyrru newid ystyrlon ar draws y GIG.

Wedi'i ddatblygu mewn ymateb i nifer gwael o bobl sy’n derbyn brechiad ffliw ledled CTM, cafodd ymgyrch ei chynhyrchu'n gydweithredol gyda mwy na 20 o sefydliadau trydydd sector a phartneriaid cymunedol, sy'n aelodau o Rhwydwaith Arweinwyr Cymuned CTM.

Roedd yr ymgyrch yn cynnwys pecyn offer cyfathrebu dwyieithog wedi'i deilwra i gymunedau lleol ac fe'i cefnogwyd gan raglen Hyrwyddwyr Brechu Cymunedol, gan alluogi arweinwyr cymunedol i gael sgyrsiau gwybodus am frechu a rhannu gwybodaeth y gellir ymddiried ynddi drwy eu rhwydweithiau.

Mae'r canlyniadau cynnar wedi bod yn galonogol, gyda niferoedd y bobl sy'n cael brechiad rhag y ffliw yn cynyddu ar draws sawl grŵp blaenoriaeth allweddol ac yn rhagori ar gyfartaledd Cymru mewn nifer o gategorïau. Mae'r ymgyrch hefyd wedi cryfhau partneriaethau rhwng y Bwrdd Iechyd a sefydliadau cymunedol, gan greu model cynaliadwy ar gyfer gwaith gwella iechyd a chymhelliant yn y dyfodol.

Yr ail ymgeisydd llwyddiannus ar y rhestr fer yw yn y categori Ymyrraeth Gynnar ac Atal ar gyfer Plant, Pobl Ifanc a Theuluoedd, gan gydnabod tîm PIPYN y Bwrdd Iechyd. Mae'r tîm yn gweithio gyda phlant ifanc a theuluoedd ym Merthyr, Cynon, Rhondda a Thaf Elái a Phen-y-bont ar Ogwr i gael mynediad at gymorth am ddim ynghylch meithrin arferion teuluol iach.

Mae PIPYN yn cynnwys pynciau fel bwyta'n iachach ar gyllideb, cynllunio prydau bwyd, bwyd fforddiadwy, arferion siopa da, ryseitiau iach, amser sgrin, chwarae egnïol a chwarae teuluol.

Bydd yr enillwyr yn cael eu cyhoeddi yn seremoni Gwobrau HSJ yn ddiweddarach eleni.

12/08/2026