Cais am Gymeradwyaeth Ymlaen Llaw (PAR)

Beth yw Cais am Gymeradwyaeth Ymlaen Llaw (PAR)? 

Fel arfer, diffiniad cais am gymeradwyaeth ymlaen llaw yw cais i glaf dderbyn triniaeth drefn ddyddiol y tu allan i wasanaethau lleol neu drefniadau contract sefydledig. 

Dim ond pan fydd yr holl opsiynau triniaeth sydd ar gael o fewn gwasanaethau sy’n cael eu darparu yn lleol neu sy’n cael eu contractio wedi'u disbyddu y dylid defnyddio'r llwybr cymeradwyaeth ymlaen llaw, a'i bod yn briodol yn glinigol ystyried cael mynediad at wasanaethau gofal iechyd mewn mannau eraill. 

Gan amlaf, bydd cais o’r fath yn perthyn i un o’r categorïau canlynol: 

• Ail farn 

• Diffyg arbenigedd/gwasanaethau lleol/wedi eu comisiynu 

• Parhad clinigol gofal (sy’n cael ei ystyried fesul achos) 

• Trosglwyddo yn ôl i’r GIG ar ôl hunangyllido gwasanaeth yn y sector preifat 

• Atgyfeiriad arall yn dilyn atgyfeiriad blaenorol at ofal trydyddol 

• Myfyrwyr 

• Cyn-filwyr 

Nid yw'r polisi Cymeradwyaeth Ymlaen Llaw yn berthnasol i'r ffactorau canlynol: (wedi'i godi o bolisi PAR)  

• Ni fydd ffactorau anghlinigol (megis statws cyflogaeth) yn cael eu hystyried wrth wneud penderfyniadau ar geisiadau am gymeradwyaeth ymlaen llaw. 

• Ni fydd ffactorau amser aros yn cael eu hystyried wrth ystyried cymeradwyaethau ymlaen llaw gan y bydd hyn, yn ddamcaniaethol, yn blaenoriaethu rhai cleifion dros eraill sydd yn yr un sefyllfa glinigol. 

• Dewis y claf. Nid yw'r GIG yng Nghymru yn gweithredu system o ddewis cleifion. Fodd bynnag, mae cleifion trawsffiniol yn gallu dewis eu darparwr gofal eilaidd. Ar ôl cyflwyno ffurflen gais am Gymeradwyaeth Ymlaen Llaw wedi'i chwblhau'n llawn, bydd panel annibynnol o weithwyr gofal iechyd proffesiynol ac aelodau lleyg yn cyfarfod i ystyried y cais am Gymeradwyaeth Ymlaen Llaw a'r dystiolaeth glinigol. 

Byddwch yn ymwybodol: 

• Dydy cyllid Cymeradwyaeth Ymlaen Llaw ddim yn talu costau teithio gofal iechyd. Ewch i'r dudalen Cymorth gyda chostau teithio'r GIG ar wefan Llywodraeth Cymru i ddarganfod a oes gennych hawl i gael cymorth gyda chostau teithio'r GIG.  

• Fydd ceisiadau am gyllid ôl-weithredol ddim yn cael eu hystyried. 

• Mae manylion personol sy'n ymwneud â'r claf yn cael eu cadw’n gyfrinachol bob amser.