Sgiliau Addysgu ar gyfer Meddygon yn cwblhau ei wythfed flwyddyn

Yn ddiweddar, cwblhaodd yr Adran Addysg Feddygol ei wythfed cwrs blynyddol 'Sgiliau Addysgu ar gyfer Meddygon' yn Ysbyty Tywysoges Cymru.

Mae'r rhaglen ddeuddydd wedi'i chynllunio i arfogi meddygon ar draws y bwrdd iechyd â sgiliau addysgu hanfodol sy’n cael eu disgwyl yn eu rolau ond nad ydyn nhw’n cael eu dysgu'n ffurfiol yn aml. Trwy gyfuniad o weithdai ymarferol a sesiynau rhyngweithiol, mae cyfranogwyr yn dysgu technegau addysgu hanfodol wedi'u teilwra i amgylcheddau clinigol, yn ogystal â manylion cwricwlwm Ysgol Feddygol Caerdydd, strwythurau cadarn i gyflwyno adborth a thechnolegau arloesol i wneud eu haddysgu'n fwy deniadol.

Gan ddechrau yn 2017, mae'r cwrs wedi esblygu dros gyfnod o wyth mlynedd ac mae bellach yn cael ei redeg gan y Dirprwy Gyfarwyddwr Meddygol Cynorthwyol dros Addysg, Dr Dewi Rogers. Mae gan y cwrs fudd ychwanegol o gael ei achredu gan Academi Addysgwyr Meddygol, sy'n golygu y gall cyfranogwyr wneud cais am aelodaeth o'r Academi ar ôl ei gwblhau, yn ogystal â darparu pwyntiau hanfodol mewn ceisiadau arbenigol i gyfranogwyr. Dywedodd Dr Rogers: "Mae wedi bod yn wych gweld y cwrs yn mynd o nerth i nerth dros yr 8 mlynedd diwethaf. Dechreuais fel cyfranogwr ar y cwrs ac yna cefais wahoddiad yn ôl fel cyfadran, cyn cymryd drosodd rôl cyfarwyddwr cwrs yn 2023. Mae wedi bod yn werth chweil gweld meddygon o bob rhan o CTM yn cymryd rhan mewn addysgu ac yn dod yn fwy hyderus fel addysgwyr."

Cafodd y cwrs eleni adborth bendigedig gyda chyfranogwyr yn unfrydol yn rhoi sgôr 'ardderchog' iddo, gan ganmol ei ddefnyddioldeb a'i berthnasedd i'w datblygiad proffesiynol.

Mae'r cwrs hefyd wedi denu sylw y tu hwnt i BIP CTM, gan arwain at gynlluniau ar gyfer cwrs arall ym mis Tachwedd. Bydd y fersiwn sydd i ddod yn cael ei noddi gan Addysg a Gwella Iechyd Cymru (AaGIC), gan ymestyn y cyfle i feddygon ledled Cymru i gael y profiad addysgu gwerthfawr hwn.

Gwybodaeth ychwanegol

Mae'r cwrs yn rhedeg bob mis Medi, bydd dyddiadau'r cwrs 2025 yn cael eu dosbarthu yn ystod y cyfnod sefydlu ym mis Awst 2025. Cysylltwch â'r Timau Addysg Feddygol ar unrhyw safle am fwy o wybodaeth.

23/10/2024