Pump peth y gallwch eu gwneud i aros yn iach a chefnogi eich GIG lleol wrth i ni ddechrau blwyddyn newydd

1. Ewch i gael eich brechu! Os ydych yn gymwys i gael brechiadau rhag y ffliw neu COVID, peidiwch â cholli allan. Cael eich brechu yw'r peth mwyaf effeithiol y gallwch ei wneud i atal eich hun rhag mynd yn sâl a dioddef effeithiau gwaethaf y feirysau hyn.
    
2. Ymwelwch yn gyfrifol. Mae achosion o'r ffliw, COVID, a salwch fel Norofeirws (byg chwydu'r gaeaf) yn cynyddu. Gall y feirysau hyn fod yn beryglus i gleifion sy’n agored i niwed mewn ysbytai, a gallant achosi prinder staff. Os ydych yn credu bod feirws gyda chi, neu wedi treulio amser gyda rhywun sydd â feirws yn ddiweddar, dylech osgoi ymweld ag ysbyty oni bai ei fod yn gwbl angenrheidiol.
    
3. Dilynwch y cyngor. Pan fyddwch yn ymweld â lleoliad GIG, efallai y bydd gofyn i chi gymryd camau penodol i leihau lledaeniad afiechydon, fel gwisgo masg, golchi'ch dwylo neu ddefnyddio diheintydd dwylo. Efallai eu bod nhw’n ymddangos fel pethau bach, ond maen nhw'n gwneud gwahaniaeth mawr.
    
4. Gwnewch ddewisiadau da! P'un a yw'n meddwl yn ofalus am wasanaeth y GIG sydd orau i chi (er enghraifft, dim ond ymweld ag adran argyfwng os yw'n argyfwng), dewis cael eich brechu, neu ymrwymo i newid ffordd o fyw ystyrlon, cynaliadwy (fel gwneud ymarfer corff bob dydd), mae gwneud dewisiadau sy'n briodol i chi a'ch iechyd yn un ffordd y gallwch ddechrau'r flwyddyn newydd yn y ffordd iawn.
    
5. Gwnewch hi'n Flwyddyn Newydd y byddwch chi'n ei chofio... am y rhesymau cywir. Does neb eisiau dechrau'r flwyddyn newydd yn ystafell aros adran argyfwng neu yng nghefn ambiwlans, felly cymerwch ofal wrth i chi ddathlu gyda theulu a ffrindiau. Mae'r GIG yn hynod o brysur yr wythnos hon felly os byddwch yn ymweld ag adran argyfwng gyda salwch neu anaf llai difrifol, mae'n debygol y byddwch yn aros am amser hir i gael eich gweld wrth i ni drin y rhai sydd â phroblemau iechyd brys sy'n peryglu bywyd.

Gan ddymuno Blwyddyn Newydd Dda ac iach i chi i gyd.

31/12/2024