Mandie Welch o CTM yn cael ei hanrhydeddu â Gwobr Genedlaethol "Pumping Marvellous Foundation"

Mae Mandie Welch, Nyrs Arbenigol Methiant y Galon, sydd wedi’i lleoli yn Ysbyty Brenhinol Morgannwg, wedi’i hanrhydeddu gan y Pumping Marvellous Foundation gyda gwobr genedlaethol am gefnogi pobl sy'n byw gyda methiant y galon.

The Pumping Marvellous Foundation yw elusen Methiant y Galon y DU a arweinir gan gleifion. Cafodd Mandie ei henwebu ar gyfer y wobr gan glaf yr oedd hi wedi bod yn ei chefnogi, ac roedd wedi'i chyfeirio at yr elusen.

Mae rôl Mandie yn cynnwys darparu addysg, cefnogaeth ac optimeiddio meddyginiaethau sy'n ymestyn bywyd i gleifion sy'n byw gyda methiant y galon.

Dywedodd y claf: “Nid yn unig y gwnaeth Mandie fy nghael i i weithio eto, fe wrandawodd ar fy mhryderon a gwneud yn siŵr fy mod yn deall.  Ers hynny, mae hi wedi bod ar gael bob cam o'r ffordd.  Fy ffefryn llwyr yw pan fydd hi’n gadael negeseuon sy’n dweud ‘dim byd i boeni amdano’ sy’n gwneud gwahaniaeth enfawr.”

Dywedodd Dr Gethin Ellis, Cardiolegydd Ymgynghorol: “Mae Mandie yn gwbl haeddiannol o’r wobr hon.  Mae hi wedi bod yn allweddol wrth ddatblygu a gwella gwasanaethau methiant y galon yn lleol ac ar raddfa genedlaethol ehangach. Mae hi wedi chwarae rhan allweddol wrth ddatblygu ap a ddefnyddir yn llwyddiannus i rymuso cleifion methiant y galon i reoli eu cyflwr. Mae Mandie bob amser yn ceisio arloesi a gwella gwasanaethau methiant y galon ymhellach. Yn y bôn, mae hi'n nyrs ragorol sy’n cael ei hoffi’n fawr.”

Dywedodd Mandie: “Gall cael diagnosis o fethiant y galon fod yn frawychus i gleifion a gofalwyr, felly mae gallu darparu’r gwasanaeth parhaus hwn i’n cleifion yn hynod werth chweil. Mae bod yn rhan o daith y claf yn fraint wirioneddol ac mae cael eich cydnabod am gael effaith gadarnhaol ar y daith honno heb ei hail. Dyna pam rydym yn caru ein swyddi, nid am y gydnabyddiaeth, ond am yr effaith barhaol a gewch ar brofiad y claf. Rydw i’n wrth fy modd i dderbyn y wobr hon a hoffwn ddiolch i’r Pumping Marvellous Foundation am y gydnabyddiaeth hon.”

04/02/2025