Gwasanaeth Presgripsiynau Electronig (EPS) bellach ar gael ym Mwrdd Iechyd Prifysgol Cwm Taf Morgannwg
Mae rhai cleifion ym Mwrdd Iechyd Prifysgol Cwm Taf Morgannwg (BIPCTM) yn elwa oherwydd gwasanaeth digidol cyfleus sy’n caniatáu i bractisau meddygon teulu anfon presgripsiynau’n electronig i’r fferyllfa gymunedol neu’r dosbarthwr o’u dewis.
Mae’r Gwasanaeth Presgripsiynau Electronig (EPS) bellach yn cael ei ddefnyddio mewn nifer o feddygfeydd o fewn ardal y bwrdd iechyd fel rhan o'i gyflwyno'n ehangach ledled Cymru.
Mae’r gwasanaeth yn nodi un o’r newidiadau mwyaf ers degawdau i’r ffordd y mae presgripsiynau’n cael eu rheoli yn GIG Cymru, gan wneud rhagnodi yn haws ac yn fwy diogel i gleifion a gweithwyr gofal iechyd proffesiynol.
Mae EPS yn golygu bod presgripsiynau’n gallu cael eu hanfon yn electronig gan feddyg teulu neu ragnodwr arall i fferyllfa neu ddosbarthwr heb fod angen ffurflen bapur. Mae'n helpu i wella gofal cleifion a'i nod yw lleihau nifer y ffurflenni papur sy'n cael eu hargraffu gan GIG Cymru.
Meddygfa New ym Mhencoed oedd y feddygfa gyntaf yn ein bwrdd iechyd i ddechrau defnyddio EPS. Cefnogwyd y gweithredu gan ddwy fferyllfa Sheppards ym Mhencoed. Ers hynny, mae wedi mynd yn fyw mewn lleoedd pellach a gallwch weld y rhestr lawn yma .
Dywedodd Sarah Bradley, Cyfarwyddwr Gofal Sylfaenol a Chymunedol Bwrdd Iechyd Prifysgol Cwm Taf Morgannwg: “Mae hwn yn gam mawr ymlaen o ran gwella effeithlonrwydd a chywirdeb gofal cleifion. Drwy symleiddio’r broses ragnodi, rydyn ni nid yn unig yn lleihau’r posibilrwydd o wallau ond hefyd yn sicrhau bod ein cleifion yn cael gofal di-dor a chydgysylltiedig.”
Dywedodd Jenny Pugh-Jones, Arweinydd EPS ar gyfer Iechyd a Gofal Digidol Cymru (IGDC): “Rwy'n hynod falch o weld EPS yn fyw ac o fudd i gymunedau ym Mwrdd Iechyd Prifysgol Cwm Taf Morgannwg. Rydyn ni bellach yn gweithio’n galed i’w gyflwyno i bob cymuned ledled Cymru cyn gynted â phosibl ac mor ddiogel â phosibl.”
Mae EPS yn rhan allweddol o raglen drawsnewid genedlaethol Moddion Digidol, a reolir gan IGDC.
Gydag EPS, nid oes angen i gleifion ymweld â'u meddygfa mwyach i gael ffurflen presgripsiwn rheolaidd. Gellir olrhain presgripsiynau o'r practis i'r dosbarthwr, sy'n golygu y gall staff weld bob amser ble mae presgripsiwn a dileu'r risg o ddarn o bapur yn cael ei golli.
Mae’r gwasanaeth yn rhad ac am ddim, ac yn fwy effeithlon a diogel. Nid oes angen i gleifion sydd am ddefnyddio EPS fynd ar-lein na defnyddio gliniadur neu ffôn clyfar. Yn syml, maen nhw’n dweud wrth staff yn eu practis meddyg teulu neu fferyllfa neu ddosbarthwr enwebedig yr hoffen nhw ddefnyddio’r gwasanaeth.
I ddarganfod mwy ewch i https://dhcw.nhs.wales/eps .
Gall staff gofal iechyd sydd â chyfeiriad e-bost y GIG hefyd gyrchu gwefan Sharepoint EPS ar https://nhswales365.sharepoint.com/sites/DHC_EPS .
29/10/2024