Gwefan yw Ymchwil Iechyd a Gofal Cymru sy’n canolbwyntio ar wella iechyd a gofal pobl a’u cymunedau. Eu nod yw hwyluso ymchwil i glefydau, triniaethau, gwasanaethau a chanlyniadau a all arwain at ddarganfyddiadau a datblygiadau arloesol i wella, ac o bosibl, achub bywydau pobl. Mae cyswllt i'w gwefan yma: https://ymchwiliechydagofalcymru.org/ .

Mae blogbost ar Ymchwil Gofal Iechyd Cymru sy’n sôn am rywfaint o ymchwil yr ydym yn ei wneud gyda phobl sydd wedi’u derbyn i Ofal Critigol i edrych ar sut y gallwn gefnogi ein cleifion yn well. I gael gwybod mwy, cliciwch ar y ddolen yma: https://healthandcareresearchwales.org/withoutresearch/blog/how-lived-experiences-shape-studies .

Genomicc

Mae'r astudiaeth hon yn archwilio a yw geneteg yn chwarae rôl mewn salwch critigol.

Bydd cleifion yn gallu cymryd rhan yn yr astudiaeth hon os ydyn nhw’n cael eu derbyn i Ofal Dwys gyda'r canlynol:

• Covid-19
• Influenza (ffliw)
• Niwmonia
• Pancreatitis
• Haint streptococol Grŵp A.
• Llosgiadau
• Heintiau eraill sy'n dod i'r amlwg neu achosion posib o adweithiau i frechlyn

Mae'r astudiaeth yn cynnwys cymryd sampl gwaed gan gleifion a chymharu'r DNA â DNA y boblogaeth gyffredinol.

Mae rhywfaint o wybodaeth yn cael ei chasglu am bob claf ynghylch eu salwch a'u cynnydd. Ni fydd unrhyw enwau ar yr wybodaeth hon ac mae’n cael ei chadw'n ddiogel.

Mae'r astudiaeth hon wedi bod yn llwyddiannus iawn wrth nodi genynnau sy'n gwneud pobl yn agored i Covid-19 sy'n bygwth bywyd.  O ganlyniad rydym wedi gallu treialu cyffuriau sy'n targedu gweithredoedd y genynnau.

ADAPT Sepsis

Mae'r astudiaeth hon yn ymchwilio i weld a all protocolau triniaeth sy'n seiliedig ar fonitro biofarcwyr (moleciwlau bach yn y gwaed) leihau hyd therapi gwrthfiotig mewn ffordd ddiogel.

Bydd cleifion yn gymwys i gymryd rhan yn yr astudiaeth hon os ydyn nhw’n cael eu derbyn i ofal dwys gydag achos posibl o sepsis, o fewn 24 awr o gychwyn gwrthfiotigau.  Yn debygol o aros yn yr ysbyty ar wrthfiotigau mewnwythiennol am o leiaf 72 awr.

Mae'r astudiaeth yn cynnwys cymryd samplau gwaed bob dydd sy'n cael eu hanfon i'r labordy.  Caiff cleifion eu dyrannu ar hap i fesur biofarcwyr gwahanol fel y gallwn weld pa un sy'n fwy defnyddiol wrth ddweud wrthym pryd y dylem roi'r gorau i driniaeth wrthfiotig. Rydym yn derbyn cyngor gan dîm yr astudiaeth yn seiliedig ar ganlyniadau'r profion gwaed bob dydd. Bydd y cyngor hwn yn dweud wrthym am barhau â'n gofal arferol neu i ystyried rhoi'r gorau i wrthfiotigau.  Does dim rhaid i ni ddilyn y cyngor hwn os dydyn ni ddim yn cytuno ag ef.

Gall yr astudiaeth hon helpu eraill yn y dyfodol, os gallwn ddod o hyd i ffyrdd gwell o benderfynu pryd i atal gwrthfiotigau ac osgoi cyrsiau hir a allai achosi sgil effeithiau neu hyrwyddo datblygiad ymwrthedd bacteriol i wrthfiotigau.

Bydd yr holl wybodaeth sy’n cael ei chasglu am gyfranogwyr yn ddienw ac yn cael ei chadw'n ddiogel.

Gall cyfranogwyr dynnu'n ôl o'r astudiaeth ar unrhyw adeg.

MOSAICC

Mae'r astudiaeth hon yn gwerthuso effeithiolrwydd arllwysiad hylif â halen penodol (sodiwm deucarbonad) ar gyfer cleifion sy'n ddifrifol wael â methiant yr arennau.

Gall cleifion difrifol wael sydd â methiant yr arennau ddatblygu lefelau asid uwch yn y gwaed ac mae hyn yn brognosis gwael iawn (dydy 59% ddim yn goroesi). Mae'r astudiaeth hon yn ystyried a yw cywiro'r asidedd â deucarbonad yn osgoi'r angen am ddialysis ('golchi' y gwaed trwy beiriant arbennig) ac yn gwella goroesiad.

Mae cleifion yn gymwys ar gyfer yr astudiaeth hon os ydyn nhw’n cael eu derbyn i’r Uned Therapi Dwys gydag anaf acíwt i'r arennau gan achosi mwy o asidedd gwaed.

Oherwydd ei bod yn bwysig dechrau'r ymyrraeth cyn gynted â phosibl, mae gan yr astudiaeth hon fodel caniatâd wedi’i ohirio.  Mae hyn yn golygu y gall tîm yr astudiaeth roi'r claf yn yr astudiaeth os yw'n rhy sâl i drafod yr astudiaeth a gwneud penderfyniad drosto'i hun.  Yna bydd y tîm yn siarad â theulu'r claf cyn gynted â phosibl i weld a yw’n credu y byddai'r claf yn dymuno cymryd rhan.  Gellir tynnu cleifion yn ôl o'r astudiaeth ar unrhyw adeg.

Bydd cleifion yn yr astudiaeth yn cael eu dyrannu ar hap i dderbyn sodiwm deucarbonad i normaleiddio'r asidedd gwaed, neu beidio â derbyn sodiwm deucarbonad.

Bydd gwybodaeth sy’n cael eu chasglu am gleifion yn ddienw ac yn cael ei chadw'n ddiogel.

i-Rehab

Mae'r astudiaeth hon yn cymharu math newydd o gymorth adsefydlu â'n gofal safonol ar gyfer cleifion sy'n gwella o salwch critigol.

Bydd cleifion yn gymwys ar ôl iddyn nhw adael yr uned gofal dwys. 

Mae'r astudiaeth yn cymharu ymyriad adsefydlu aml-gydran 6 wythnos sy’n cael ei darparu o bell gyda gofal arferol, dydy hwn ddim yn adsefydlu strwythuredig.

Bydd cleifion yn cael eu dyrannu ar hap i bob grŵp.

Mae 4 cydran i'r rhaglen adsefydlu: rheoli symptomau yn wythnosol, ymarfer corff wedi'i dargedu, cefnogaeth seicolegol a gwybodaeth/cefnogaeth gan gymheiriaid.

Y canlyniad sy’n cael ei mesur fydd ansawdd bywyd sy'n gysylltiedig ag iechyd 8 wythnos ar ôl casglu canlyniadau ar hap.

ADFERIAD

Mae'r astudiaeth hon yn ymchwilio i wahanol driniaethau ar gyfer Covid-19.  Dyma'r brif astudiaeth sy'n edrych ar hyn yn y DU ac mae wedi arwain at yr holl driniaethau rydym yn eu defnyddio ar hyn o bryd ar gyfer ein cleifion.

Triniaethau Effeithiol:

• Decsamethason, tociluzimab/sarilumab, gwrthgyrff monoclonaidd, baricitinib

Triniaethau Aneffeithiol:

• Azithromycin, hydrocsiclorocwin, lopinovir-ritonovir, asbirin, plasma ymadfer

Dal i Aros am Ganlyniadau:

• Dimethyl fumarate, corticosteroidau dos uchel, empagliflozin, sotrovimab, molnwpirafir.

Mae cleifion sy'n cael eu derbyn i'r ysbyty gyda Covid-19 yn gymwys i gymryd rhan yn yr astudiaeth hon ac yna byddan nhw’n cael eu dyrannu ar hap i dderbyn un neu fwy o'r triniaethau sy'n cael eu profi ar hyn o bryd.  Bydd yr holl wybodaeth sy’n cael ei chasglu yn ddienw ac yn cael ei chadw'n ddiogel.

REMAP-CAP

Nod yr astudiaeth hon yw pennu a diweddaru'n barhaus y set orau o driniaethau ar gyfer niwmonia a ddaliwyd yn y gymuned.

Mae hefyd yn ymchwilio i driniaethau ar gyfer Covid-19 a'r ffliw.

Mae cleifion yn gymwys ar gyfer yr astudiaeth hon os ydyn nhw’n cael eu derbyn i ofal dwys gyda niwmonia, Covid-19 neu ffliw.

Byddan nhw’n cael eu dyrannu ar hap i dderbyn cyfuniadau gwahanol o driniaethau gan gynnwys gwrthfiotigau gwahanol, cyfnodau gwahanol o wrthfiotigau, cyffuriau gwrth-firol a steroidau.  Bydd gwybodaeth yn cael ei chasglu am eu cynnydd, yn ddienw ac yn cael ei chadw'n ddiogel.

SIGNET

Mae'r astudiaeth hon yn archwilio a all cyffuriau sy’n cael eu defnyddio i drin colesterol uchel (statinau) wella canlyniad organau wrth drawsblannu.

Efallai y bydd cleifion sydd wedi marw ac sy'n addas ar gyfer rhoi organau yn cael eu cynnwys yn yr astudiaeth hon.

Bydd yr astudiaeth yn cael ei thrafod gyda'r teulu yn ystod y sgyrsiau am roi organau.

Ei nod yw gweld a yw cyffuriau statin yn gwella canlyniadau derbynwyr yr organau a roddwyd.