Tîm Biocemeg Glinigol BIPCTM yn ennill gwobr Cynaliadwyedd Sefydliad Gwyddoniaeth Fiofeddygol
Enillodd Tîm Biocemeg Glinigol Bwrdd Iechyd Prifysgol Cwm Taf Morganwg (BIP CTM) Wobr Sefydliad Gwyddor Biofeddygol (IBMS) am Gynaliadwyedd, yn seremoni wobrwyo IBMS a gynhaliwyd yn Llundain ar 4ydd Gorffennaf, 2025.
Cafodd tîm Biocemeg Glinigol BIP CTM eu anrhydeddu am fenter arloesol yr adran, 'O fainc labordy biocemeg i fainc parc', sy'n canolbwyntio ar ailgylchu plastigau labordy gradd uchel. Mae'r prosiect yn archwilio ffyrdd arloesol o ailddefnyddio plastigion, a fyddai fel arfer yn cael eu gwaredu fel gwastraff clinigol neu gyffredinol trwy losgi neu dirlenwi.
Gyda dros 21,000 o aelodau ar draws 74 o wledydd, yr IBMS yw'r corff proffesiynol blaenllaw ar gyfer gwyddonwyr biofeddygol, staff cymorth a myfyrwyr.
Mae Gwobrau IBMS yn darparu platfform i arddangos gwaith ac arloesedd eithriadol mewn gwyddoniaeth fiofeddygol, ac i gydnabod y bobl, y timau a'r sefydliadau sy'n cyflawni gwaith rhagorol yn y proffesiwn gwyddoniaeth fiofeddygol.
Drwy gydweithio ag adran Gyfleusterau CTM, Elite Paper Solutions a Pulse Plastics, llwyddodd y tîm i leihau gwastraff plastig 15%, drwy wahanu, ailgylchu ac ailddefnyddio'r plastig. Yn ystod treial chwe mis, cafodd 2000 o boteli adweithydd a 9000 o hambyrddau tip eu dargyfeirio o losgi ac yn lle hynny, cawson nhw eu hailddefnyddio at ddefnydd gweithgynhyrchu cynaliadwy.
Dywedodd beirniaid y gwobrau: “Hyrwyddodd yr enillydd [BIP CTM] wyddoniaeth fiofeddygol o fewn y gymuned ehangach, gan ddefnyddio cynaliadwyedd fel cyfrwng i ddangos ymrwymiad y sefydliad i ymgysylltu â'i phoblogaeth leol a'i chefnogi.”
Dywedodd Andrea Wayman, Prif Weithredwr, ELITE Paper Solutions: “Rydym wrth ein bodd bod ein partneriaeth â thîm gwasanaethau Biocemeg Glinigol BIPCTM wedi cael ei chydnabod a’i hanrhydeddu gyda’r wobr hon. Yn ogystal â chefnogi ymdrechion cynaliadwyedd BIPCTM, mae'r gwaith hwn yn cefnogi prentisiaid, pobl anabl a phobl ag anfanteision cymdeithasol i gael cyflogaeth ystyrlon trwy raglenni hyfforddi a hwylusir gan ELITE Paper Solutions.
Dywedodd Mark Henry, Rheolwr Gwasanaeth Biocemeg Glinigol: “Rydym wrth ein bodd yn derbyn Gwobr IBMS 2025 am Gynaliadwyedd. Mae'n wych cael ein hymdrechion yn cael eu cydnabod gan ein corff proffesiynol ein hunain. Mae'r fenter wedi ennill cydnabyddiaeth nid yn unig am ei heffaith amgylcheddol ond hefyd am ei phwyslais cryf ar gyfrifoldeb cymdeithasol, gan osod meincnod ar gyfer arferion cynaliadwy mewn gwyddor gofal iechyd.
“Roedden ni’n gallu lleihau gwastraff clinigol a lleihau allyriadau carbon, tra ar yr un pryd yn cefnogi cyfleoedd cyflogaeth ystyrlon i bobl dan anfantais drwy ein partneriaethau. Mae'r wobr hon yn dyst go iawn i waith caled ac ymrwymiad ein staff, yn enwedig wrth hyrwyddo gwahanu gwastraff yn well a gwneud cynaliadwyedd yn rhan o'n harferion bob dydd. Hoffwn ddiolch yn fawr iawn i'n tîm cyfleusterau am eu cydweithrediad agos a'u cefnogaeth.”
Dywedodd Calum Shaw, Rheolwr Cynaliadwyedd: “Drwy gydweithio â phartneriaid allanol, mae tîm gwasanaethau Biocemeg Glinigol wedi gallu ymgorffori egwyddorion economi gylchol mewn rheoli gwastraff, gan arwain at ostyngiad mewn allyriadau carbon, a chefnogi'r bwrdd iechyd ehangach trwy leihau ein hôl troed carbon.”
06/08/2025