Mae SilverCloud Cymru yn ehangu drwy lwybr atgyfeirio amenedigol newydd
Mae gwasanaeth Therapi Gwybyddol Ymddygiadol (CBT) Ar-lein GIG Cymru wedi sefydlu llwybr atgyfeirio newydd gyda'r tîm amenedigol ym Mwrdd Iechyd Prifysgol Cwm Taf Morgannwg (BIPCTM).
Gall y tîm nawr atgyfeirio rhieni newydd a rhieni sy’n disgwyl at 'Gofod i Les Amenedigol', rhaglen iechyd meddwl ar-lein sy'n seiliedig ar CBT ac wedi'i phweru gan SilverCloud®
Dywedodd arweinydd amenedigol BIPCTM, Jade Beasant: "Mae'n rhaglen hollol anhygoel.
"Mae bod yn rhiant newydd yn dod ag ystod eang o bwysau a gofynion newydd, ond beth sy’n wych am SilverCloud yw y gallwch weithio trwy'r modiwlau yn eich amser eich hun, ac ar drywydd sy’n siwtio chi.
"Dyma ymyrraeth, heb yr holl jargon, sy’n canolbwyntio ar y claf, ar ei gorau."
Mae 30,000 o bobl wedi derbyn cefnogaeth gan SilverCloud Cymru, sy'n cael ei ariannu gan Lywodraeth Cymru, ers iddo gael ei dreialu gan Fwrdd Iechyd Addysgu Powys yn 2018.
Mae 'Gofod i Les Amenedigol' yn rhoi i rieni newydd a rhieni sy’n disgwyl y sgiliau ymdopi ymarferol ar gyfer rheoli symptomau ysgafn i gymedrol o hwyliau isel, straen a gorbryder, a gellir eu cyrchu ar-lein, unrhyw bryd, trwy ffôn symudol, llechen neu gyfrifiadur.
Caiff cynnydd ei fonitro gan gefnogwyr hyfforddedig, sy'n rhannu adborth bob pythefnos ac yn gallu uwchgyfeirio achosion mwy difrifol i gyrchu cymorth pellach.
Dywedodd Jade: "Mae'r ffaith bod y claf yn cael cefnogaeth unigol gan yr un person drwy gydol ei daith heb ei ail, ac mae'n golygu eu bod yn llawer mwy tebygol o gwblhau'r cwrs cyfan."
Gall unrhyw un yng Nghymru 16+ oed atgyfeirio at SilverCloud am ddim heb weld meddyg teulu neu ymuno â rhestrau aros.
Mae BIPCTM wedi bod yn atgyfeirio at y gwasanaeth trwy ei dimau Iechyd Meddwl Sylfaenol Lleol a thimau Plant a Phobl ifanc ers mis Ebrill, tra bod yr adran amenedigol wedi bod yn cyfeirio cleientiaid at y gwasanaeth.
Fodd bynnag, dywedodd Jade eu bod yn fwy tebygol o elwa ar gefnogaeth glinigol SilverCloud drwy'r broses atgyfeirio uniongyrchol newydd.
"Pan fyddwch chi’n cyfeirio rhywun, rydych chi’n croesi’ch bysedd ac yn gobeithio eu bod nhw'n mynd i hunanatgyfeirio, ond pan maen nhw'n ceisio rheoli iechyd meddwl gwael, y cymhelliant yna yn aml yw'r peth cyntaf sy'n mynd," meddai.
"Pan rydyn ni'n gwneud yr atgyfeiriad, maen nhw ar ein llwyth achosion ni a gallwn bwysleisio’r pwysigrwydd o gwblhau'r rhaglen."
Dywedodd rheolwr prosiect CBT Ar-lein GIG Cymru, Fionnuala Clayton, bod dau fwrdd iechyd arall i fod i ddechrau atgyfeirio at SilverCloud yn fuan.
"Rydyn ni bob amser yn dweud bod gofalu am eich babi yn dechrau gyda gofalu amdanoch chi, ond rydyn ni'n gwybod pa mor anodd y gall fod i gymryd y cam cyntaf hwnnw a gofyn am help," meddai Fionnuala.
"Weithiau gall atgyfeiriad uniongyrchol sy’n cael eich gwneud ar eich rhan fod yr eiriolaeth sydd ei angen arnoch i ddechrau ar eich taith at deimlo'n well, ac mae gwybod bod y ddau wasanaeth yn cydweithio i'ch cefnogi yn ychwanegu sicrwydd ychwanegol."
30/09/2024