CTM yn croesawu Pennaeth Bydwreigiaeth newydd
Mae Debbie Jones wedi’i phenodi’n Bennaeth Bydwreigiaeth ym Mwrdd Iechyd Prifysgol Cwm Taf Morgannwg.
Dechreuodd Debbie ei gyrfa ym myd nyrsio a bydwreigiaeth 20 mlynedd yn ôl, ac yn fwyaf diweddar bu’n Bennaeth Diogelwch ac Ansawdd Cleifion Bwrdd Iechyd Prifysgol Caerdydd a’r Fro. Mae hi wedi gweithio mewn amrywiaeth o rolau sy’n ymwneud â bydwreigiaeth, gan gynnwys gofal mamolaeth risg uchel, sonograffeg a dyletswyddau bydwragedd arweiniol gweithredol. Arweiniodd Debbie y gwaith o sefydlu’r gwasanaeth sonograffeg bydwreigiaeth, model sy’n cael ei roi ar waith mewn byrddau iechyd eraill ledled Cymru.
Wrth siarad am ei phenodiad dywedodd Debbie: “Rydw i’n gyffrous i fod yn ymuno â CTM ac yn edrych ymlaen at fod yn rhan o dîm sy’n ymdrechu i ddarparu’r gofal gorau oll i fenywod a theuluoedd.
“Fel cefnogwr grymuso cleifion i wneud penderfyniadau gwybodus am eu gofal, rydw i’n angerddol am sicrhau bod eu lleisiau’n cael eu clywed, a sicrhau’r canlyniadau gorau posibl. Rydw i’n credu bod cydweithio â menywod a theuluoedd yn arwain at ddatblygu a diwygio gwasanaethau’n ystyrlon.”
Mae gan Debbie brofiad o greu a gweithredu polisïau, strategaethau, pwyllgorau, a grwpiau llywodraethu. Mae hi hefyd wedi chwarae rhan allweddol wrth weithredu newid ar draws y sefydliad i gefnogi’r agenda Sicrhau Ansawdd ac Effeithiolrwydd Clinigol, gan gynnwys y fframwaith Ansawdd, Diogelwch a Phrofiad.
Fel rhan o'i hethos, mae Debbie yn rhoi pwyslais mawr ar annog lles a datblygiad gweithwyr, y mae hi'n teimlo sydd â chysylltiad annatod â diogelwch cleifion a gofal o ansawdd uchel. Mae'n cefnogi hyrwyddo ymwybyddiaeth o werthoedd ac egwyddorion y Bwrdd Iechyd gan ei bod yn teimlo mai dyma'r sylfeini y gall diwylliant iach o ran diogelwch cleifion a dysgu ffynnu arnyn nhw.
Dywedodd Suzanne Hardacre, Cyfarwyddwr Bydwreigiaeth CTM: “Rydw i’n falch iawn o allu croesawu Debbie i’r tîm yn CTM. Bydd ei phrofiad ym maes diogelwch cleifion ac o gydweithio â defnyddwyr gwasanaethau i sicrhau gwelliannau parhaus yn ased enfawr i’n tîm.”
15/07/2024