Nyrs Ddeintyddol

Fy ngyrfa mewn Nyrsio Deintyddol

Cymhwysais fel nyrs ddeintyddol yn 2016 yn dilyn rhaglen 2 flynedd gyda Phrifysgol Caerdydd. Roeddwn i'n ddigon ffodus i sicrhau fy lleoliad gwaith yn yr Uned Addysgu Deintyddiaeth yn y Porth yn 2014. Dros y ddwy flynedd fe ddatblygais fel unigolyn ac ennill llawer o sgiliau sydd eu hangen i helpu ymarferwyr deintyddol ym mhob agwedd ar driniaeth ddeintyddol a gofal cleifion, gan sicrhau bod y feddygfa'n rhedeg yn esmwyth ac yn effeithlon.

Ar ôl cwblhau'r rhaglen, enillais fy nghymhwyster ynghyd â swydd llawn amser yn yr Uned Addysgu Ddeintyddiaeth. Yma rydw i’n gweithio gyda thîm mawr, gan ddarparu cymorth a chefnogaeth i ddeintyddion newydd gymhwyso yn eu blwyddyn Hyfforddiant Sylfaen. Rydw i wedi cael y pleser o weithio gyda llawer o Ddeintyddion Sylfaen sydd wedi pasio drwy'r system hon dros yr 11 mlynedd diwethaf.

Pam wnaethoch chi ddewis gyrfa mewn nyrsio deintyddol?

Rydw i bob amser wedi bod â diddordeb mewn gofal iechyd, yn enwedig wrth helpu pobl i deimlo'n well a gofalu am eu lles. Roedd nyrsio deintyddol yn caniatáu i mi wneud yn union hynny, wrth weithio mewn amgylchedd sy'n ddeinamig ac yn werth chweil.

Mae rôl Nyrs Ddeintyddol yn fwy na dim ond 'pasio pethau i ddeintydd'. Mae'n cynnwys sgiliau technegol ac mae'n ymwneud â sicrhau bod cleifion yn teimlo'n gyfforddus ac yn cael eu cefnogi mewn sefyllfa sy'n aml yn gallu achosi straen i rai. Mae rhywbeth sy'n rhoi boddhad mawr am weld hyder rhywun yn cynyddu ar ôl triniaeth lwyddiannus ac yn gwybod fy mod wedi chwarae rhan yn y broses honno.

O weithio gyda phlant, i oedolion o bob oed, paratoi ar gyfer gwahanol weithdrefnau deintyddol a hyd yn oed ddarparu arweiniad ar hylendid y geg, nid oes dau ddiwrnod yr un fath.

Pa gyngor fyddech chi'n ei roi i rywun sy'n chwilio am swydd mewn Nyrsio Deintyddol?

Os oes gennych angerdd am ofal iechyd ac awydd i helpu pobl a'r cyfle i wneud gwahaniaeth ym mywydau cleifion, yna gallai ystyried gyrfa mewn Nyrsio Deintyddol fod y llwybr gyrfa iawn i chi.

Beth yw eich camau nesaf neu eich dyheadau gyrfa yn y dyfodol?

Mae cyfleoedd parhaus ar gyfer datblygiad proffesiynol bob amser ac mae hyn yn rhywbeth rydw i’n ei werthfawrogi'n fawr. Rydw i am ddatblygu ar lefel bersonol a phroffesiynol ac ar hyn o bryd rydw i’n ymdrechu i wneud hynny trwy weithio tuag at y cymhwyster Lefel 3 mewn Arweinyddiaeth a Rheolaeth (ILM) i helpu i'm cefnogi yn fy nghynlluniau o weithio mewn rôl arwain yn y dyfodol.