5. Dysgu am fwyd trwy chwarae

Mae chwarae blêr yn rhoi ffordd hwyliog i'r plentyn deimlo gweadau newydd. Gall dod i gysylltiad ag amrywiaeth eang o weadau eu gwneud yn llai gwrthwynebus i wahanol deimladau.

Mae angen i blant ddysgu am fwydydd newydd pan nad oes unrhyw fygythiad. Mae arnyn nhw angen gweld neu deimlo bwyd sawl gwaith cyn y byddan nhw'n ystyried ei flasu neu ei fwyta. Mae prydau bwyd yn aml yn gysylltiedig â disgwyliadau, ac mae llawer o blant yn defnyddio llawer o’u hegni yn amddiffyn eu hunain rhag profiadau synhwyraidd newydd sy'n teimlo'n beryglus iddyn nhw. Cysur a diogelwch sydd bwysicaf yn ystod prydau bwyd. Pan fydd plant yn teimlo'n ddiogel ac yn gyfforddus, maen nhw'n fwy parod i fentro ac i ymuno mewn profiadau newydd

Drwy ganiatáu i'ch plentyn chwarae gyda bwyd rhwng prydau bwyd, byddan nhw’n dod yn fwy hyderus o amgylch bwyd. Byddan nhw’n fwy tebygol o fod yn barod i brofi bwyd mewn ffyrdd eraill. Fel oedolion rhaid i ni ei gwneud hi'n hwyl i'r plentyn a pheidio â cheisio perswadio'r plentyn i gymryd brathiad, a thrwy hynny ganiatáu i'r plentyn ddod yn gyfarwydd â bwyd trwy chwarae.

Efallai y bydd angen i chi chwarae gyda'r un bwydydd dro ar ôl tro, gan mai trwy ddod i gysylltiad â nhw drosodd a throsodd y daw’r plentyn yn fwy hyderus ac i fwynhau chwarae gyda nhw. Os na allan nhw oddef gwead neu fwyd penodol, peidiwch â’i gynnig am ychydig ac yna rhowch gynnig arno eto yn nes ymlaen

Gadewch iddyn nhw chwarae gyda bwyd mewn gwahanol ffyrdd, er enghraifft:

• Anogwch eich plentyn i'ch helpu i wneud brechdanau i bobl eraill, gallwch dorri'r brechdanau’n wahanol siapiau neu ddefnyddio craceri yn lle bara os ydyn nhw’n hoff o weadau caled.
• Gall bagiau gyda sip roi cyfle i’ch plentyn gyffwrdd bwydydd heb faeddu. Gallwch roi bwyd o unrhyw fath yn y bag, ac ambell un o’u teganau neu dudalen wedi'i lamineiddio e.e. defnyddiwch rifau/llythrennau neu rywbeth y byddai'r plentyn â diddordeb ynddo. Bydd yn rhaid iddyn nhw symud y bwyd er mwyn dod o hyd i'r tegan neu'r rhif ar y ddalen. Mae hon yn ffordd hwyliog o gyflwyno bwydydd newyd.

• Defnyddiwch ddiddordebau eich plentyn er mantais i chi. Felly os ydyn nhw'n hoff o rifau/llythrennau, gallwch chi wneud gêm drwy eu rhoi mewn powlen a’u gorchuddio â bwyd.
• Os yw eich plentyn yn bwyta rhywbeth nad yw'n fwyd e.e. brigyn:
• Ceisiwch gyfnewid yr eitem gyda bwyd o’r un lliw, gwead neu faint. Mae’n well ei gyfnewid na dweud na. Mae’r plentyn angen dewis arall a rhywfaint o eglurhad. Gallech chi ddweud mai adar sy’n cario brigau yn eu cegau.

Bydd gwell cynnydd fel arfer os yw’r bwyd wedi cael ei gynnwys mewn chwarae blêr, ar adegau cwbl ar wahân i brydau bwyd. Peidiwch ag anghofio ei wneud yn hwyl!