Rhaw yn y tir ym Mharc Iechyd Llantrisant wrth i weinidogion nodi carreg filltir bwysig i'r GIG
Nicola Prygodzicz, Prif Weithredwr BIP Aneurin Bevan, Paul Mears Prif Weithredwr BIP Cwm Taf Morgan, Eluned Morgan MS, Prif Weinidog, Jeremy Miles MS Ysgrifennydd y Cabinet Iechyd a Gofal Cymdeithasol, Vicky Le Grys Cynllunio Strategol Bwrdd Iechyd Prifysgol Caerdydd a'r Fro
Mae adeiladu cyfleuster gofal iechyd mawr newydd ar gyfer y De-ddwyrain wedi dechrau'n swyddogol, gyda seremoni “torri tir” a fynychwyd gan Brif Weinidog Cymru Eluned Morgan a Jeremy Miles, Ysgrifennydd y Cabinet dros Iechyd a Gofal Cymdeithasol.
Mae'r digwyddiad yn nodi cam allweddol wrth adeiladu Parc Iechyd Llantrisant, datblygiad arwyddocaol a fydd yn trawsnewid mynediad at ddiagnosteg a gofal wedi’i gynllunio ar draws y rhanbarth.
Mae'r parc iechyd newydd, ger Ysbyty Brenhinol Morgannwg yn Rhondda Cynon Taf, yn cael ei ddarparu gan Fwrdd Iechyd Prifysgol Cwm Taf Morgannwg mewn partneriaeth â byrddau iechyd Caerdydd a'r Fro ac Aneurin Bevan. Mae'n fuddsoddiad mawr mewn seilwaith modern y GIG ac yn ddull cydweithredol i ddiwallu’r galw cynyddol am ofal iechyd.
Yn cael ei adeiladu gan gwmni adeiladu gofal iechyd MTX, bydd cam cyntaf y prosiect yn gweld creu Canolfan Diagnosteg Gymunedol o'r radd flaenaf, gan gynnig gwasanaethau ganio MRI a CT, endosgopi a phrofion hanfodol eraill. Disgwylir i'r cyfleuster ehangu capasiti, lleihau amseroedd aros a gwella profiad y claf ledled De-ddwyrain Cymru.
Dywedodd Paul Mears, Prif Weithredwr Bwrdd Iechyd Prifysgol Cwm Taf Morgannwg: “Mae Parc Iechyd Llantrisant yn gam cyffrous ymlaen i wasanaethau gofal iechyd yn Ne-ddwyrain Cymru.”
“Drwy ddod â gwasanaethau ynghyd mewn cyfleuster pwrpasol, byddwn yn gwella mynediad, lleihau oedi a sicrhau profiad gwell i gleifion ledled y rhanbarth.”
Bydd y parc iechyd hefyd yn cynnwys cyfleusterau hyfforddi i gefnogi datblygiad y gweithlu gofal iechyd, gan helpu i sicrhau cynaliadwyedd hirdymor gwasanaethau.
Unwaith y bydd wedi'i gwblhau, disgwylir i Barc Iechyd Llantrisant chwarae rhan ganolog wrth ddarparu diagnosis cyflymach, triniaeth fwy effeithlon a chanlyniadau gwell i gleifion, gan leddfu'r pwysau ar safleoedd ysbytai presennol.
Dywedodd y Prif Weinidog Eluned Morgan: “Mae Parc Iechyd Llantrisant yn fuddsoddiad mawr yn ein GIG, a fydd yn rhoi hwb i’r capasiti profi ac yn ei gwneud hi’n haws ac yn gyflymach i bobl gael asesiadau’n agosach at adref.
“Yn dilyn y buddsoddiad ychwanegol rydym wedi’i ddarparu a gwaith caled staff y GIG, rydyn ni newydd weld gostyngiad sydd wedi torri pob record yn rhestrau aros y GIG, sydd bellach ar eu lefel isaf ers bron i chwe blynedd.”
“Bydd Parc Iechyd Llantrisant, ynghyd â buddsoddiadau eraill yn ein hystâd GIG, yn helpu i wella mynediad at ofal a lleihau amseroedd aros ymhellach.”
Dywedodd Ysgrifennydd y Cabinet dros Iechyd a Gofal Cymdeithasol, Jeremy Miles: "Rwy'n falch iawn o weld gwaith yn dechrau ar y prosiect mawr hwn, sy'n dangos ein hymrwymiad i adeiladu GIG sy'n gweithio i bawb yng Nghymru.
“Drwy ddod â thri bwrdd iechyd ynghyd, rydym yn cymryd camau ymarferol i leihau amseroedd aros a gwella gofal cleifion i bawb yn Ne-ddwyrain Cymru.”
“Bydd y ganolfan hefyd yn hyfforddi’r genhedlaeth nesaf o staff y GIG, gan sicrhau bod clinigwyr yn cael eu hyfforddi i ddefnyddio offer o’r radd flaenaf a fydd yn gwneud ein GIG yn gryfach nawr ac yn y dyfodol.”
Mae'r seremoni torri tir yn nodi'r trawsnewid o gynllunio i adeiladu, a bydd y datblygiad yn garreg filltir i ofal y GIG yn y dyfodol yn Ne-ddwyrain Cymru.
27/03/2026