Gwobr y Prif Swyddogion Nyrsio am Gyflawniad Oes
Da iawn i Greg Padmore-Dix, ein Cyfarwyddwr Gweithredol Nyrsio, Bydwreigiaeth a Gofal Cleifion a enillodd Wobr y Prif Swyddogion Nyrsio am Gyflawniad Oes yng Ngwobrau Nursing Times 2023 a gynhaliwyd yn ddiweddar yn Llundain. Mae'r gwobrau'n dwyn ynghyd y gymuned nyrsio i roi goleuni ar y dalent fwyaf disglair yn y proffesiwn ac i gydnabod y rhai sy'n gwneud nyrsio yn arloesol, yn canolbwyntio ar y claf ac yn gynhwysol.
Pedwar Prif Swyddog Nyrsio’r DU sy'n penderfynu ar y Wobr am Gyflawniad Oes, ac fe wnaethon nhw ddisgrifio Greg fel "arweinydd gweladwy, tosturiol a charedig" sydd "bob amser yn barod i fynd y tu hwnt i hynny".
Dywedodd Prif Swyddog Nyrsio Cymru: "Fe wnes i enwebu Greg ar gyfer Gwobr Nursing Times y GIG oherwydd ei gyfraniad eithriadol i ofal cyfannol sy'n canolbwyntio ar yr unigolyn a'r Proffesiwn. Mae'n dangos y gallu i fynd y tu hwnt i'r rhinweddau arweinyddiaeth disgwyliedig, gan fynd i'r afael â'r materion nyrsio mwyaf cymhleth wrth barhau i fod yn ystyriol, diymhongar a gweithiwr proffesiynol cyflawn. Mae Greg wir yn poeni am bobl a'r proffesiwn, gan helpu i ddatblygu a chefnogi ein cenhedlaeth o arweinwyr nyrsio yn y dyfodol. Mae'n gwneud gwahaniaeth ac yn parhau i wneud gwahaniaeth."
Dywedodd Greg: "Diolch o galon i Sue Tranka, Prif Swyddog Nyrsio Cymru am fy enwebiad ac i Brif Swyddogion Nyrsio eraill y DU am roi'r wobr hon i mi. Roeddwn i'n teimlo mor ddiymhongar o fod wedi ennill y wobr hon sy'n dyst i'r nyrsys a'r bydwragedd anhygoel rydw i wedi cael y fraint o weithio gyda nhw dros y 37 mlynedd diwethaf."
Meddai Paul Mears, Prif Weithredwr Bwrdd Iechyd Prifysgol Cwm Taf Morgannwg: "Rwyf wrth fy modd bod cyfraniad sylweddol Greg at arweinyddiaeth nyrsio wedi cael ei gydnabod gan y Prif Swyddogion Nyrsio ledled y DU. Mae Greg yn Gyfarwyddwr Gweithredol Nyrsio profiadol sydd wedi gweithio mewn sawl sefydliad GIG sy'n arwain timau nyrsio a bydwreigiaeth gyda brwdfrydedd, tosturi ac ymroddiad.
"Yn ystod ei gyfnod yn CTM, mae Greg wedi goruchwylio'r gwelliant sylweddol yn ein gwasanaethau bydwreigiaeth a newydd-enedigol yn ogystal â darparu arweinyddiaeth weladwy a brwdfrydig i'n nyrsys, bydwragedd a gweithwyr cymorth gofal iechyd. Mae Greg wedi cefnogi nifer o fentrau cenedlaethol ym maes nyrsio ac yn ystod y flwyddyn ddiwethaf mae wedi dod yn Ddirprwy Brif Weithredwr, gan gydnabod ei brofiad sylweddol a'i gyfraniad i fwrdd y sefydliad. Ar lefel bersonol rwy'n falch bod cyfraniad Greg fel arweinydd nyrsio wedi cael ei gydnabod yn genedlaethol gan y wobr fawreddog hon."
31/10/2023