Gwisgo masg yn orfodol ar bob safle ysbyty
Eleni rydym yn profi math mwy difrifol o ffliw yn cylchredeg ar draws ein safleoedd a'n cymunedau nag yn y blynyddoedd diwethaf. Er mwyn helpu i reoli lledaeniad y feirws ac achub bywydau'r rhai mwyaf agored i niwed, rydym wedi ymestyn gwisgo masgiau gorfodol i staff, ymwelwyr a chleifion ar safleoedd ein hysbytai tan 12 Ionawr 2026.
Ers cyflwyno gwisgo masgiau ar 24 Tachwedd, rydym eisoes wedi gweld y rôl bwysig y mae'n ei chwarae wrth arafu lledaeniad yr haint. Mae ymestyn y gofyniad hwn yn hanfodol i amddiffyn cleifion, cydweithwyr a'n cymunedau ehangach yn ystod y tymor ffliw eithriadol o heriol hwn.
Rhaid i bob aelod o staff, claf ac ymwelydd (oni bai eu bod wedi'u heithrio'n glinigol) wisgo masgiau sy’n atal hylifau wrth fynd i mewn i'n safleoedd ysbytai, wardiau, coridorau, Adrannau Argyfwng a phob lleoliad clinigol, gan gynnwys ein Hunedau Mân Anafiadau (MIUs).
Pan fyddan nhw’n cael eu gwisgo'n gywir, mae masgiau'n gweithio fel hidlydd sy'n lleihau nifer y germau rydych chi'n eu hanadlu i mewn ac allan. Os maen nhw’n cael eu gwisgo gan rywun sydd â feirws, gall masgiau leihau'r siawns o'u lledaenu i eraill yn sylweddol.
Mae masgiau’n cael eu darparu wrth fynedfeydd adeiladau.
Hoffem hefyd atgoffa’r cyhoedd, cleifion a’r rhai sy’n ymweld ag anwyliaid yn yr ysbyty o bwysigrwydd atal lledaeniad salwch.
Helpwch ni drwy ddilyn y camau isod:
Cael eich brechu
Os ydych yn gymwys i gael brechiadau rhag y ffliw neu COVID, peidiwch â cholli allan. Cael eich brechu yw'r peth mwyaf effeithiol y gallwch ei wneud i atal eich hun rhag mynd yn sâl a dioddef effeithiau gwaethaf y feirysau hyn.
Cynnal hylendid dwylo da
Golchwch eich dwylo'n aml â sebon a dŵr, neu defnyddiwch ddiheintydd dwylo. Gall hyn ymddangos fel peth bach, ond mae'n gwneud gwahaniaeth mawr.
Ymweld yn gyfrifol
Gallwch ein helpu i atal lledaeniad y feirws drwy ymweld â safleoedd ein hysbytai dim ond os yw'n gwbl angenrheidiol.
Gall afiechydon anadlol a firysau fod yn beryglus i gleifion bregus mewn ysbytai.
Os oes gennych imiwnedd gwan, os ydych chi'n meddwl bod gennych chi feirws neu os ydych chi wedi treulio amser yn ddiweddar gyda rhywun sydd â feirws, osgoi ymweld â'n hysbytai.
Cymorth gyda rhyddhau
Gyda nifer uchel o achosion o ffliw ar draws ein hysbytai ar hyn o bryd, gofynnwn am eich cefnogaeth. Os oes gennych aelodau o'r teulu sy'n addas yn feddygol i gael eu rhyddhau, helpwch ni i hwyluso eu bod yn dychwelyd adref yn ddiogel. Mae hyn yn ein galluogi i sicrhau eu diogelwch a'u lles.
02/12/25