Mae gan fyrddau iechyd gyfrifoldeb i ddarparu gwasanaethau dementia iechyd meddwl i bobl hŷn.
Defnyddir y term 'dementia' i ddisgrifio syndrom a all gael ei achosi gan nifer o afiechydon lle mae dirywiad cynyddol mewn sawl maes gweithrediad, gan gynnwys dirywiad yn y cof, rhesymu, sgiliau cyfathrebu a'r gallu i gyflawni gweithgareddau dyddiol. Gall pobl hefyd ddatblygu symptomau ymddygiadol a seicolegol fel iselder, seicosis ac ymddygiad ymosodol.
Os oes unrhyw un yn poeni am golli cof yn ein cymuned, rydym yn annog pobl i siarad â’u meddyg teulu – mae llawer o gefnogaeth a help ar gael.
Mae Cwm Taf Morgannwg wedi cynnal adolygiad o’i wasanaethau dementia iechyd meddwl i bobl hŷn.
Edrychodd yr adolygiad ar:
Sut mae ein gwasanaethau'n cael eu darparu ar hyn o bryd i gefnogi pobl sy'n byw gyda dementia;
Y cymorth sydd ar gael i bobl sy’n byw gyda dementia ar draws ein rhanbarth; a
Sut mae ein gwasanaethau’n cymharu â gwasanaethau eraill ledled Cymru a’r DU ehangach o ran arfer gorau.
Nododd yr adolygiad fod gwasanaethau dementia iechyd meddwl i bobl hŷn yn cael eu darparu’n wahanol iawn ar draws sawl rhan o Gymru a’r DU, gyda chanlyniadau gwahanol i bobl sy’n byw gyda dementia.
Mae ein poblogaeth hŷn yn cynyddu a bydd llawer mwy o alw am ein gwasanaethau dementia iechyd meddwl yn y dyfodol.
Rydym am sicrhau bod pobl sy’n byw gyda dementia, yn awr ac yn y dyfodol, yn cael mynediad at y cymorth sydd ei angen arnyn nhw, ar yr adeg iawn, ac yn y lle iawn.
Ar hyn o bryd, mae ein gwasanaeth yn cael ei ddarparu mewn lleoliadau gofal dydd, ond rydym yn gwahodd ein cymunedau i rannu eu barn ar 'wasanaeth cymunedol peripatetig' arfaethedig yn y dyfodol.
Mae gwasanaeth cymunedol peripatetig yn wasanaeth hyblyg. Yn hytrach na darparu cefnogaeth a gofal mewn lleoliad sefydlog, bydd gwasanaeth cymunedol peripatetig yn teithio o amgylch rhanbarth Cwm Taf Morgannwg, gan gyrraedd gwahanol leoliadau i gefnogi unigolion i fyw'n annibynnol yn y gymuned.
Byddai'r gwasanaeth ar gael mewn nifer o leoliadau gan gynnwys cartrefi a lleoliadau cymunedol.
Y nod wrth symud i Wasanaeth Cymunedol Peripatetig yw cynyddu faint o gymorth arbenigol sydd ar gael i bobl sy'n byw gyda dementia, i gefnogi pobl i fyw'n dda yn eu cymuned, cyhyd ag y bo modd.
Cynhyrchwyd y canlynol i ddarparu mwy o wybodaeth am wasanaethau dementia iechyd meddwl i bobl hŷn ac i chi roi gwybod i ni am eich barn.