Rhannwch eich barn ar fodel y dyfodol ar gyfer Gwasanaethau Dementia Iechyd Meddwl i Bobl Hŷn ar draws Cwm Taf Morgannwg

Mae gan fyrddau iechyd gyfrifoldeb i ddarparu gwasanaethau dementia iechyd meddwl i bobl hŷn.

Mae Cwm Taf Morgannwg wedi cynnal adolygiad o’i wasanaethau dementia iechyd meddwl i bobl hŷn. Edrychodd yr adolygiad ar:

Sut mae ein gwasanaethau'n cael eu darparu ar hyn o bryd i gefnogi pobl sy'n byw gyda dementia
Y cymorth sydd ar gael i bobl sy’n byw gyda dementia ar draws ein rhanbarth
Sut mae ein gwasanaethau’n cymharu â gwasanaethau eraill ledled Cymru a’r DU ehangach o ran arfer gorau.

Nododd yr adolygiad fod gwasanaethau dementia iechyd meddwl i bobl hŷn yn cael eu darparu’n wahanol iawn ar draws sawl rhan o Gymru a’r DU, gyda chanlyniadau gwahanol i bobl sy’n byw gyda dementia

Dweud eich dweud

Mae ein poblogaeth hŷn yn cynyddu a bydd llawer mwy o alw am ein gwasanaethau dementia iechyd meddwl yn y dyfodol. Rydym am sicrhau bod pobl sy’n byw gyda dementia, yn awr ac yn y dyfodol, yn cael mynediad at y cymorth sydd ei angen arnyn nhw, ar yr adeg iawn, ac yn y lle iawn.

Heddiw, mae cyfnod ymgysylltu o 10 wythnos wedi dechrau, lle mae ein cymunedau wedi cael eu gwahodd i rannu eu barn a’u hadborth ar sut yr ydym yn darparu gwasanaethau dementia iechyd meddwl yn y dyfodol, ac i ddweud eu dweud yn benodol ar fodel gofal newydd arfaethedig, a elwir yn 'Gwasanaeth Cymunedol Peripatetig'.

Mae llawer o ffyrdd i chi rannu eich adborth:

Gellir dod o hyd i wybodaeth ategol a chefndir i'r cynnig (gan gynnwys briffio llawn) isod:

Sesiynau Ymgysylltu â'r Cyhoedd

Rydym wedi trefnu nifer o gyfarfodydd ymgysylltu yn ystod y cyfnod ymgysylltu, yn cynnwys defnyddwyr gwasanaethau, gofalwyr, perthnasau a sefydliadau partner gan gynnwys awdurdodau lleol a’r sector gwirfoddol a chymunedol.

Gallwch hefyd fynychu sesiynau ymgysylltu â’r cyhoedd cyffredinol ar-lein, lle gallwch gael rhagor o wybodaeth am y cynnig a gofyn unrhyw gwestiynau ar y dyddiadau canlynol:

Ar-lein trwy Teams

13.00yp i 14.00yp, Dydd Mawrth 10 Medi 2024
10.00yb i 11.00yb, Dydd Gwener 20 Medi 2024
18.30yp i 19.30yp, Dydd Mercher 16 Hydref 2024

Os hoffech ymuno ag un o’r sesiynau ar-lein hyn, anfonwch e-bost atom yn CTM.MHLD.ServiceEngagement@wales.nhs.uk a byddwn yn anfon dolen atoch ar gyfer y sesiwn.

Bydd y cyfnod ymgysylltu yn rhedeg o 9.00 yb ddydd Llun 2 Medi 2024 tan 5.00 yp ddydd Llun 11 Tachwedd 2024.